Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin və Caspian Capital Group-un birgə təşkilatçılığı ilə 3 dekabr - Beynəlxalq Əlilliyi olan Şəxslər günü ilə əlaqədar Əlilliyi olan şəxslərin XII Ümumrespublika yaradıcılıq-sərgi müsabiqəsinə start verilib. 

Yaradıcılıq-sərgi müsabiqəsi "Şərq Bazarı" ticarət kompleksi və Azərbaycan Rəssamlıq Akademiyasının dəstəyi ilə həyata keçirilir. 

30 noyabr - 1 dekabr tarixlərində "Şərq Bazarı" ticarət kompleksində keçiriləcək tədbirdə Bakı və respublikamızın bölgələri üzrə 195 əlilliyi olan şəxsin 2500 əl işi nümayiş olunub.  

Sərgidə rəsm, xalçaçılıq, toxuculuq, bədii tikmə, bədii oyma, oyma ilə suvenir, muncuqlar ilə suvenir və digər nominasiyalar üzrə nümunələr təqdim olunub. 

Təqdim edilən yaradıcılıq nümunələri münsiflər heyəti tərəfindən əlilliyi olan şəxslərin yaş qrupları da nəzərə alınmaqla qiymətləndiriləcək. Müvafiq nominasiyalar üzrə yer tutan müəlliflərə diplom və mükafatlar, həmçinin sərgi-müsabiqənin digər iştirakçılarına həvəsləndirici mükafatlar və təşəkkürnamələr təqdim olunacaq.  

Tədbirin davamı kimi 3-6 dekabr tarixlərində Azərbaycan Rəssamlıq Akademiyasının muzey-sərgi kompleksində əl işlərinin satış-sərgisi olacaq.

 Müsabiqənin məqsədi əlilliyi olan şəxslərin yaradıcılıq fəaliyyətinin stimullaşdırılması, onların cəmiyyətə inteqrasiyasına dəstək göstərilməsidir.